Usa ka resolusyon ang gipadas-og ni konsehal Atty. Raul Barbaso atol sa regular nga sesyon niadtong Marso 31, 2015 isip usa sa mga rekisitos alang sa paghangyo ngadto sa buhatan sa Tourism Infrastructure and Economic Zone Authority alang sa pagpatuman sa Cogon Eco-Park Road Network sa barangay Cogon ning dakbayan sa Dipolog.
Kahibaloan nga usa sa mga priority projects sa pamunu-an ni Mayor Evelyn T. Uy mao ang Road Networks alang sa pagpalambo sa turismo ilabi na ang Cogon Eco-Park, diin ang gikinahanglang pondo ang pagahangyo-on ngadto sa gihisgutang buhatan sa TIEZA.
Nasayran nga ang maong luna angayan alang sa mga field trips sa mga magtutungha ug mga magtutudlo. Makatabang usab kini alang sa ekonomikanhong katuyoan sa syudad, gumikan kay ang mga residente ug ang mga magpapatigayon ang makabenepisyo sa panahon nga mapatuman kini.
Lakip nga nasayran nga alayon kini sa panglantaw sa siyudad nga mamahimong Center of Outdoor Sports of the South by the year 2020 gumikan kay haom ang maong luna alang sa maong katuyoan, busa niining bahina hugtanon nga gikinahanglan ang mga road networks.
Kahibaloan nga gigahinan sa buhatan sa DENR sa mikabat 344 ka ektarya nga luna alang sa dugang kalamboan sa nasangpit nga parke Gilangkuban kini sa second growth trees, natural grown trees, dipterocarp species, commercial species ug duna’y mikabat 50 ka ektarya nga gitamnan sa rattan. Datu kini sa ‘biodiversity’ ug mao na lamang kini ang nagpabiling lasang dinhi sa dakbayan, nga kasikbit sa Mt. Bulao watershed latas ngadto sa Polanco ug lungsod sa Piñan. (CIO-MECC)

Share on: