Atol sa ika-118th nga kasumaran sa Philippine Army (PA) dinhi sa nasud, usa ka Static Display ang gipahigayon sa 101st Infantry Brigade didto sa Dipolog City Boulevard alang sa pagbulok sa maong kasaulogan niadtong Marso 22,2015.
Matud pa ni Brigade Executive Officer, Lt. Col. Cornelio Arboleda, nga ang selebrasyon sa founding anniversary sa PA ang gina-selebrar sa tibuok Pilipinas sa matag petsa 22 sa bulan sa Marso sa matag tuig.
Ang katuyoan sa maong static display mao nga makapahibalo ngadto sa mga katawhan kung unsa ang army, unsa ang ilang ginabuhat, unsa ang ilang mga kagamitan sama sa mga tangkeng ig-gugubat, kanyon, ug uban pang mga kagamitan alang sa panggubatan.
Lakip nga gisaysay ni Col. Arboleda nga masuwerte ang mga katawhan ning lalawigan sa Zamboanga del Norte ilabi na sa dakbayan sa Dipolog gumikan kay usa kini ka malinawon nga dapit, busa nasuta sa kadaghanan nga andam na kini alang sa kalambuan.
Nagkanayon si Col. Arboleda nga bisan ug anaa pa gihapon ang mga hulga kabahin sa New People’s Army (NPA), apan matud pa nga dili kini angay’ng kabalak-an gumikan kay dili man mahinungdanon ang mga hulga nila, sanglit nga dili kini makahatud ug kalambuan sa ilang mga kinabuhi.
Sumpay pa ni Arboleda nga gahulat lamang ang kasundalohan sa nasud nga motahan na lamang ang mga NPA ngadto sa gobyerno dala ang ilang mga armas gumikan kay ang pagpakigbaka dili mao’y solusyon sa problema sa kapobrehon.
Dugang pa ni Arboleda nga sila sa army dili na angayan pang mosulti kabahin sa dakbayan sa Dipolog gumikan sa natagamtamang kalinaw niini. Nasuta kini sa tibuok nasud nga ang dakbayan usa ka malinawong dapit .
Matud pa sa koronel nga nasayran na sa iyang buhatan nga ang mga LGU ilabi na dinhi sa lalawigan sa Zamboanga del Norte ang kasagaran nagahimo ug ‘outreach programs, diin ning bag-ohay pa lamang nakapahigayon ang brigade sa ‘Bayanihan Out- Reach Program’ didto sa lungsod sa Godod pinaagi sa koordinasyon sa brigade ngadto sa Provincial Government, ubos sa liderato ni Governor Roberto Y. Uy.
Sa pagkakaron, matud pa ni Col. Arboleda nga minimal na lamang ang pagpakigbisog o ang pagpakiggubat nga ginamit ang mga ‘armas de fuego’, gumikan kay gina-awhag na lamang sa kasundalohan karon ang mga rebeldeng NPA alang sa pagpasurender ngadto sa gobyerno ug aron maka-angkon usab sila ug hinabang alang sa ilang panginabuhi-an dinha sa ilang pagsugod sa ilang bag-ong kinabuhi.
Gi-awhagan usab sa koronel ang mga katawhan alang sa pagko-operar ngadto sa kasundalohan ilabi na kung duna’y masayran nga mga tawo nga lumilihok batok sa gobyerno. (CIO-MECC)

Share on: