Usa sa mga mibolok sa kasaulogan sa Labor Month sa bulan sa Mayo, mao ang Talenyado Night nga gipahigayon niadtong Mayo 31, 2015 didto sa Dipolog Boulevard diin nakapakita sa ilang tagsa-tagsa ka mga talento o abilidad ang mga mamumuo nga nagagikan sa nagkalain-laing pribadong establisemento ning dakbayan.
Nagkanayon si Mayor Evelyn T. Uy atol sa maong kalihukan, nga girepresentahan ni City Civil Registrar, Ms. Rosemarie P. Miranda, nga ang Talenyado Night maoy usa ka kalihukan sa mga kawani gikan sa pribadong sektor diin naghatag ug “relaxation” ug “entertainment” sa mga partisipanteng kawani nga wala nalakip sa ilang kaakuhan isip mga empleyado dinha sa ilang tagsa-tagsa ka mga kompaniya. Dugang sa gipabati nga mensahe ni Mayor Uy, nga usa usab kini ka maayong pamaagi sa pagdasig sa mga kawani sa pribadong sektor gumikan kay mapakita nila ang ilang mga abilidad, makakita sila ug dugang nga mga higala, ug maghatag usab kini nga kalihukan ug panaghi-usa tali sa mga kawani ug management nga makamugna ug maayong relasyon sa tanan.
Nagkanayon usab si DOLE ZDNFO Chief LEO, Ms. Lourdes B. Amores, nga anaa na sa ika-limang tuig ang programang Talenyado Night nga ubos sa buhatan sa DOLE ning dakbayan, diin dugang pa niini nga usa kini ka pamaagi aron pakapakita ang mga mamumuo sa ilang tinagu-ang talento.
Sanglit nga usa kini ka kulbahinam nga higayon alang sa gihisgutang mga kawani nga mosalmut alang sa maong indigay, busa nasaksihan sa kadaghanan ang talento sa matag usa. Sa pag-awit, sayaw ug talento kabahin sa sand-art.
Ang migulang manana-og alang sa Individual Category mao ang mosunod:
1st- Jolly Bee, Rizal Avenue, Dipolog City-nakadawat sa premyong P4,000.00.
2nd- Real Motors, Quezon Avenue, Dipolog City, nakadawat sa premyong P3,000.00.
3rd- SECC Computer, General Luna Street, Dipolog City, P2,000.00.
Samtang ang migulang manana-og alang sa Group Category, mao ang mosunod :
1st- Banco Dipolog, Rizal Avenue, Dipolog City, nakadawat sa premyong P10,000.00.
2nd- Jolly Bee, Rizal Avenue, Dipolog City, nga nakadawat usab ug P6,000.00., ug
3rd- GA Alano and Sons Credit, Quezon Avenue, Dipolog City, P4,000.00.
Alang sa dugang nga bolok sa nasangpit nga kalihukan, usa ka raffle draw ang gipahigayon, diin gikalipay usab kini ug daku lakip sa mga tumatambong sa maong kalihukan. (CIO-MECC)

Share on: