Gipahibalo karon ang publiko ilabi na gayud niadtong but-ot nga mosaksi sa PBA games nga ipahigayon dinhi sa dakbayan sa Dipolog karong umaabot Pebrero 14, 2015 sa Dipolog Sports Center, nga aduna ray lima (5) ka outlets ang gibutang sa Kagamhanang Lokal sa Dipolog alang sa pagbaligya ug PBA tickets.
Ang mga gi-ilang PBA ticket outlets naglangkob sa Lee Plaza, sa lobby sa City Hall, City Treasurer’s Office, City Mayor’s Office ug Reina Marketing.
Gipasabot ni Atty. Chandler O. Ruiz, ang Chairman sa Youth Sports Development Council sa Dipolog ug usa sa mga focal person sa PBA games dinhi, nga gi-ila karon nga mga 5 ka ticket outlets aron malikayan ang pagbaligya unya sa pekeng tickets. Walay laing outlet ang giila sa kagamhanang lokal gawas lang niining 5 ka mga outlets.
Nasayran nga ang mga bag-ong presyo sa PBA tickets naglangkob sa Php1,500.00; P1,250.00; P750.00; P500.00 ug P150.00 isip general admission. Kini nga pag-usbaw nagsumikad usab sa pagpahigayon sa Comissioner’s Cup diin aduna nay mga magdudulang import ang matag team sa PBA games.
Dugang ni Ruiz, walay pag-usbaw sa presyo sa tickets niadtong nakakuha na alang niadtong dula unta sa Disymebre 6, 2014.
Ang preliminary games dula-on sa may alas 2:30 ang takna sa hapun tali sa SVC Valiants ug Syhawks sa St. Joseph College sa Sindangan sa Pebrero 14, ning tuiga, ug ang dulang PBA magsugod sa alas 5:00 ang takna sa hapun sa susama gihapong adlawa. (CIO-prr)

Share on: