Andam na ang kagamhanang lokal ning dakbayan alang sa gikatakdang pagpahigayon sa tulo (3) ka mga managlahing dagkong sports events nga dinhi ipahigayon sa atong dakbayan sulod sa bulan sa Mayo, karong tuiga.
Mao kini ang nakuhang kasayuran sa buhatan sa impormasyon gikan kang Dipolog City Youth Sports Development Chairman, Atty. Chandler O. Ruiz, niadtong nakalabay nga semana.
Sigun sa nasayran nga karong umaabot bulan sa Mayo, ning kasamtangang tuig, tulo ka mga managlahing dagkong paugnat sa kusog ang ipahigayon dinhi sa atong dapit nga gilangkoban sa: “1st Dipolog City Dragonboat/kayak championship” nga ipahigayon sa Mayo 2 ug 3, dinha sa Dipolog boulevard, samtang sa pagka Mayo 9 ug 10, ipahigayon usab ang “Dipolog City Triathlon 102”, diin ang langoy ug dagan niini ang anha ra ipahigayon sa Dipolog boulevard sama sa nakalabay nga tuig, samtang ang pagbisekleta niini ang manukad gikan sa Boulevard ngadto na sa Dipolog Sports Center, nga mobalik-balik sa unom ka higayon.
Ang ikatulong dula mao ang pagpahigayon na usab sa ika upat ka higayon sa PBA Governor’s Cup, nga mahitabo karong adlaw sa atong kapistahan nga mao ang Mayo 16, 2015. Ang mga PBA teams nga magdula mao na usab ang “Barangay Ginebra” ug “Blackwater Elite”.
Dugang npa ni Atty. Ruiz, nga kon wala lang gayu’y dagkong kakuli-an, madayon gayud kining nahisgotang mga dula sigun sa gikatakda, diin tuyong gipasiugdahan sa kagamhanang lokal sa Dipolog, gumikan sa panglantaw sa dakbayan nga mamahimong sentro sa paugnat sa kusog dinhi sa habagatang Mindanao sa umaabot tuig 2020, ilawom karon sa kasamtangang liderato ni City Mayor Evelyn T. Uy.
Subay ning maong kalamboan, gi-awhagan karon ang tanang mga katawhan ilabi na gayud kadtong mga mahiligon sa dula sa pagsuporta ning maong mga kalihokan.(CIO-alb)

Share on: