Human sa lumba sa Dragon Boat ug Kayak niadtong Mayo 2, 2015 nga gipahigayon didto sa kadagatan sa Dipolog Boulevard, usa ka ‘Tuloy Salo-salo’ ang gisunod pinasiugdahan sa Dipolog City Agriculture Office, ubos sa pagpangulo ni OIC-City Agriculturist, Engr. Kerr Porlas.
Gikahimut-an ug daku ilabi na sa mga bisitang misalmut nga nagagikan sa nagkalain-laing dapit sa nasud gumikan kay sahi kini nga salo-salo gumikan kay usa kini ka kinan-anay sa isdang tuloy. Sanglit nga abunda sa nasangpit nga isda ang Dipolog busa usa kini sa gitanyag alang sa mga bisita.
Samtang nunot usab niini, mipa-abot sa iyang kinasing-kasing nga pasalamat ngadto sa tanang mga katawhan ang inahan ning dakbayan Mayor Evelyn T. Uy, gumikan kay matud pa niini, nga usa ka halandumon ang unang higayon nga mipahigayon ang Dipolog niining Dragon Boat and Kayak Competition, nga nasaksihan sa atong mga katawhan.
Nakadayeg si Mayor Uy ilabi na ngadto sa contingents gikan sa Philippine Marines gumikan kay sa matag kompetisyon nga ilang gisalmutan sa nagkalain-laing dapit, sila ang nanghatag usab ug mga pahalipay ngadto sa pipila ka mga kabataan sama sa pagpanghatag ug mga tsinelas ug pagpahigayon ug mass feeding.
Nagkanayon usab si Mayor Uy nga siya nanghinaut ug nagtuo nga makaya usab nga abton sa contingent sa Dipolog ang kadaugan.
Lakip nga mihatag sa iyang mensahe mao si City Youth Sports Council Chairman, Atty. Chandler O. Ruiz, diin matud pa niini nga ang “dragon boat race” ang unang gipahigayon didto sa nasud sa China. Namugna kini gikan sa usa ka tinuho-ang Insik nga ang mga batan-ong mosalmut sa lumba ang maka-angkon ug daghang abot gikan sa ilang kaumahan. (OIC-MECC)

Share on: