Andam na ang gikatakdang pagpahigayon sa usa ka mass wedding nga gibansagan ug “TWOGETHER FOREVER”, karong umaabot adlaw’ng Martes, Pebrero 10, ning tuiga.
Kining nahisgotang mahitabong kasalan ang adto pagahimoon sa Building B, Twin Commercial complex, nga nahimutang didto sa Dipolog Boulevard, sa may alas 2:00 ang takna sa kahaponon, sa nasangpit nga petsa ug adlaw.
Sigun sa dugang nasayran nga ning kasamtangan, adunay 24 ka paresan ang nahimong kwalipikado nga paga-kaslon, human nahimo-an ug pagsusi ang mga papeles nga gisubmiter niini ngadto sa nahisgotang buhatan.
Dugang usab nga nasayran, nga ang mohimo sa pagkasal mao si City Mayor Evelyn T. Uy, duyog na sa pag-abag sa mga personahe gikan sa buhatan sa City Civil Registrar ning dakbayan, isip tipik sa programa sa kagamhanang lokal sa Dipolog, ug sa pagbolok usab sa kasamtangang pagsaulog sa “Civil Registration Month” ning tibuok bulan sa Pebrero.
Kahinumdoman, nga sa matag bulan sa Pebrero sa matag tuig, nahimo nang na-andan ang pagpahigayon ug mass wedding sa kagamhanang lokal sa Dipolog, isip tabang ngadto sa mga nanag-ipon na nga mga paresan, apan wala pa nakasal gumikan sa pipila ka mahinungdanong mga rason, aron mahimong legal ang panag-ipon niini pinaagi sa usa ka kasal.(CIO-alb)

Share on: