Nahimong malampuson ang pagpahigayon sa ika-50th Annual Induction and Oath Taking sa Zamboanga del Norte Press Club niadtong Abril 11, 2015 didto sa Top Pensionne ning dakbayan sa Dipolog.
Mipasalamat ug daku si Col. Jesus A. Manangquil, Jr. ngadto sa mga opisyales ug mga miyembro sa ZN Press Club kinsa midapit kaniya aron mamahimong pinasidunggang mamumulong ug inducting officer sa bag-ong napiling mga opisyales sa maong kapunungan sa media dinhi sa lalawigan.
Nagkanayon si Col. Manangquil nga iyang gi-ila ang kamahinungdanon sa tahas sa prensa ilabi na diha sa mga military campaigns. Ang media duna’y dakung misyon alang sa kalambuan sa usa ka nasud gumikan kay sila man ang magpahibalo ngadto sa mga katawhan pinaagi sa ilang pagpanibya sa kahanginan ug sa mga pamantalaan.
Dugang pa ni Col. Manangquil nga ang media mao ang haligi sa atong demokrasya. Sanglit nga bisan sa mga makuyaw nga mga panghitabo anaa makita ang mga media practitioners nga nag-cover sa mga talan-awon aron makapahibalo sila sa sakto ug tukmang balita ngadto sa publiko.
Ang mga mithi nga gipanlimbasogan sa mga katawhan sa media mao ang nakahatag ug inspirasyon ug kadasig sa mga lungsuranon ilabi na alang sa panglantaw kabahin sa kalinaw ug kalamboan. (CIO-MECC)

Share on: